Numbers 36
Zelophehad Tanute Luahna
1Joseph suan-a bawng’te panin Manasseh tapa, Makir tapa Gilead bawng’a innkuan makaite va pai-in Moses le Israel-te innkuan lutangte makaite mai-ah thu a sung uh hi. 2Amaute in, “TOPA in kote topa tungah Israel-te in aisan-a a luah ding uh leitang a piak lai-in amah in nang tungah kote sanggampa Jelophehad luah dingte a tanute tungah piak dingin thu hong pia hi. 3A zenzenin tu-in amaute in Israel beh dangte mah pasalin nei le uh; tua ciangin amau luahte a pu a pate uh luahna panin khenkhia-in amau pasal neihna behte aa ah kigawm ding hi. Tuaci bangin ko luah dinga hong kipiasate hong kilakkhiatsak ding hi. 4Israel-te adingin Jubilee kum ciangin a goutanh uh amau pasal neihna behte aa ah kigawmin amau neihsate ka pute uh minamte luahna panin a kilakhia ding hi,” a ci uh hi. 5 Tua ciangin Moses in TOPA thupiakna bangin Israel-te tungah, “Joseph suante bawng’ genna amaan hi. 6Hih in Zelophehad tanute adingin TOPA thupiak ahi hi: Amaute in amaute pate behte bawng’te a tenpih nak uh leh amau lungkimna khat peuhpeuh tenpih thei uh hi. 7Israel-te sungah beh khat pan beh khatah a luahsate uh a kipiasawn thei kei ding uh hi; ahang in, Israel mi peuhmah in ama pute pana a luah ama beh leitang kem ding hi. 8Israel mi peuhmah in a pate luahsa a neih theih nadingin leitang a luahsa Israel beh sunga ta numei peuhmah in a pa beh sunga bawng’ pan - khat teitei tawh a kiteng pelmawh ding hi. 9Israel behte in amau luah leitang ciat a kep theih nadingun a luahte uh, beh khat le beh khat a kipia sawn thei ding uh hi, ci hi,” ci-in a gen hi. a 10 Tua ciangin TOPA in Moses a thupiak bangin Zelophehad tanute a gamta uh hi. 11Zelophehad tanute - Mahlah, Tirzah, Hoglah, Milcah le Noah-te in - a pate lamte a tenpih uh hi. 12Amaute in Joseph tapa Manasseh suante bawng’ tenpih uh a, a pate uh beh le bawng’ ah a luahte uh a kipsuak hi. 13 Hihte in Jericho a pana Jordan gun ngahtanna gei, Moab zanglei a, TOPA in Moses tungtawna a piak ngeinate ahi hi. b
Copyright information for
ZomZIV